ويحلى الكلام على راجل محلاه ويبقى محلاه

يا اشقر يا زين.... يا مشعل قلبي بالنار
بخضرت العين ....خليتلي قلبي محتار
يا خدود الورد... و الورد منك خجلان
يا ربيع القد ...و القد من غصن البان
على حر الجمر... انا مستنية ليل و نهار 
يا قاسي القلب... و القلب منك محروق
يا مثيل البدر ...و البدر عاطر بهواك
يا نسيم الفجر ....و الفجر عاطر ببهاك
على حر الجمر... انا مستنية ليل و نهار
هات مرقومك و لفني وهزني للجنانك
هات إيدك خرجني من حفرة الهبال
تنصحني في النهار مرة
تعديلي بهبالي ,,, وقباحة لساني ..
وتقول نعرفك ... مني وليا ... والباقي
ماليه أهمية .... يا ربيع القد والقد من غصن البان ..
صابر عليا.... كل مرة تقول .. هاي بش تجي للثنية ...
ثنية عشقتنا وهدرتنا ...
و أنا كل مرة نزيد في الجرعة شوية ,,,,
هبلة .. قباحة ... بلادة ... تزعبين ما يملالك عين ..
إنت فخامتك ... ما ترضاش .. بالفن الهابط ..
والقباحة المبتذلة .... لا ليها لا راس ولا ساس ...
أما كي تقلي موش نلوم فيك ... راني نتبع فيك ..
نحبك قميرة ضواية ,,, موش طقطوقة طفاية ,,,
فهمتك يا عزيزي فهمتك ,,,,,, ولو ما نفهمكش إنت
أنا لاني ليك ولاني متاعك ,,, أوووه يا عزيزي
قداش تكبر في عيني ,,, كي تقلي راني ننصح فيك موش نلوم عليك ...
واللوم بعد القضاء بدعة ,,, و أنا متاعك وليك ...
لا نجم نقلك سامحني ... خاتر لا عمري رجعت في كلامي
و خاتر نعرفك بش تقلي يا مرا يزيك ,,, تعرفني موش نلوم فيك
على شنوة بش نسامحك ......
ياريدي يخليك ويعليك على من يعاديك .....

‫#‏محلاك_ياراجل_محلاك‬

°°°° حومة °°°°

نظرية حومة للحياة الفايس بوكي

قبيحة شوايا وقابلة للنقاش
في مخي ساعات نقول ,,,, محلاهم هاك العلقات الإفتراضية و أحسن حاجة بش إدوم حلاوتو السحرية
كونو يبقى ورا سور الفايسبوكية والمجهولية وما يتنقلش للحياة الواقعية ....
خلينا هكة خير ,,, نقولها كي تحس روحك تقرب للآخر إن كان مرا ولا راجل ,,, عازب والا صبية
طفل والا بنية ,,,,
و ساعات نقول على حكاية خلينا هكة ,,, والا موش هكة ,,,
الي هيا بلا معنى ,,,
على خاتر أنا كي نلقى بعض البروفيلات الي نتناغم معاهم ,,, ويسعدني لقاهم ...
وما جريتش وراهمبش يكونو معايا فايس بوكيا مثلا في حالة يكونو ذكورة ,,,,
على خاترو زبور وأنا شاهية نعمل معاه حاجة بنينة ,,,,, مثلا وهذي عقلية تو نحكيو عليها نهار آخر
الإزبرار الي يجبدني ,,, للبعض البروفيلات إناث ولا ذكور ,,, كان ,, في الفكرة
والكلمة ... والروح السمحة ,,,الي خارجة من بروفيل مجهول ,,, لا عندي لا أصلو ولا فصلو ,,,
ولا حاشتي بش نعرف أكثر ,,, ولا عمري سهلتكم لا على خصوصياتكم ,,, ولا حبيت نعرف أكثر
ولا بعت الي ,,, نعرفهم ,,, وعطيتهم للحد سألني على فلان والا فلتلنة ,,,
فقط الي ضروني والي يحبو يضروني .... نعرفهم بالواحد ونعرف السيناريو الي يروجوفيه عليا
وعلى عيشتي ,,, والي ما ينجمشي يضرني بصفة مباشرة اهوكا ساعات يسلطو عليا ,,, شكون بش يدرعولي خواطري,,,, لاغير يعني المضرة تكون إفتراضية عامة ,,,, وهذا الكل تجاوزتو معا الوقت ,,,,,
تعرفني وتعرف ماضية ؟؟؟ بالحق ؟؟؟ بلحاط يبلحطك ,,, إلي تعرفو أمسح بيه و حاول توصل بيه للقمم
الجامات والديسكسيونات الي لا بتودي ولا بتجيب ولا فيها مربوح لا فلوس ولا سلطة ,,,, ههه مالا غنيمة
الحاصل بش ما نطولش عليكم ,,,, خوزعبلات القيل والقال الفايس بوكي ... متاع حشرات إستخرئية ....
___ ونرجعو للي يرفطنا أنا وإنتما معشر الفايسبوكيين ومن منطلق تفكيري وفلسفتي ههههه
هيا الفكرة والكلمة والروح السمحة نعاودها ألف مرة ,,,,
وهذاكا الي بش يبقى يربطنا ,,,, الفكرة الجميلة ,,, موش إزبرارك وإزبراري ...
ممكن يجي نهار ونتقابلو في الدنيا ,,, وممكن تعجبني ونعجبك إزبراريا كان أنثى والا ذكر باقي نعاودها زادة ....
وممكن تصير بيناتنا حكات وممكن إطول والا تقصار ,,, ,,, لكن الي باش يدوم ,,, هو الفكرة
المزيانة الي تلاقينا بيها ,,,, وحتى لا يقدر ,,, بعدنا ,,, ديما الفكرة باش تبقى ,,,, ضو يشعشع
في قلوبنا ,, وبيه تتدفى أرواحنا ,,,,, مهما بعدت الأجساد والا قربت ,,, أنا مرا نفهمكم ونحاول بش نفهم
نفسيتكم ,,, وفيكم الي فهمني وفهم روحانية الفكرة وتشبثو بيها ....
الفكرة تزرعها وحدك وتقطف ثمارها معنا هوني ,,, والي بش تزرعو انتي بش نحصدوه كلنا ,,,,
راهي تونس صغيرة ,,, والفايس بوك أصغر ,,,,,
ما تقتلوش الفكرة بالتعفونات ,,, والسارقات و الكلامات والسلمات ...
وخليونا نعيشو على فكرة ,,, إيجابية ,,, تفرحنا وتزهينا ,,,,,
وتملي حياتنا وليالينا ,,,,,
سامحو قباحتي ’’’ ساعات ما تنجم توصل هدرة معينة كان بالوقاحة ,,, من غير جراحة ,,,
______بنة الحومة ______

J’aime ·  · Partager

البنة كيف تحكي عالراجل _بقية °°° محلاك يا راجل محلاك °°°

مسيكم بالخير والخمير
هذي شوايا من هدرتنا ,,, روايتنا كتبناه لينا
من ورا السنجق العالي ,,, والعشقة كل يوم تكبر ,,, بين يدينا
طراوة ورتبة وكلام موزون .... قدر ووهرة ... منو ليا ,, ومني ليه
قماش قديم ,,, وطريزتو ,,بالفيانة ,,, وكل غرزة العشقة تكبر وتكبر
هدرتنا متاعنا ,,, لينا ,,, منورة ليالينا ,,, و في كل مغارب
نشعلو شموع زاويتنا ,,,, محلاه محلاه ,,, وكل يوم حلاوتو تزيد ...
عاد في ليلة شرط شرطة متاع هبال و رشيت على السنجق الريحان
وقتلو:
- موش هذا هبال؟؟ تمشيشي تقول مهبولة ؟؟
رجع بجواب ,,, صرني من الفاد وقال :
- لو كان موش الهبال اللي كيفي وكيفك ما ينجموش يعيشو مع "العاقلين"
عادا تلفت وقتلو والقلب فيه تنهيدة :

_ما نحبش يجي نهار وانا نولي عليك غريبة وانت نوليلك طريدة
فهمت فكرتي نحن زو كبار
زوز
واعيين
ممكن الي تعدى عليك اهون ملي تعدى عليا
أنا مرا اوراها برشة مسؤلية ومشاكل
نحبك تكون في الجزء الباهي من حياتي
الجزاء المنور
المنعوش
اااااااااااايييه نحب نخبيك
في جنينة اسراري
____
وكيف العادة بغرزة مرتوبة رد عليا وقال بكل ديمغرافية وحنانة راجل فنان

-الله لا يجيب ها النهار ومافماش علاش من اصلو...قوة الهدرة في الفكرة موش في كيفاش بدات وكيفاش باش تصير...احنا تلاقينا وتفاهمنا في عالم موازي...باش تجي ايامات نقربو ع لخر وايامات نبعدو شوية على خاطر في العالم الحقيقي فمة حاجات باش تعطلنا وتلهينا..لكن الزوز متأكدين اللي الفكرة هي عين الماء العذبة اللي ديما ترجعنا الزوز نشربو منها لين نرواو...وارد زادة يجي نهار نقابلو في العالم الحقيقي ممكن يكون لقاء رائع كيما الفكرة وممكن زادة يكون لقاء عادي كيفو كيما العالم الحقيقي اللي اكثرو عادي وقليل فيه الرائع..هذاكة علاش نحبك تخليها سفينتنا تسير لانك لا انتي لا آنا نجّمو نسوقو سفينة في بحر موجتو عالية
عادا أنا زعيمة في تبديل الهدرة غزرت وجاوبتو من ورا السنجق :

-ومحلاها حكاية و محلى أمواجها ,,,,, ورا السور مرة تسخن عندي و مرة تسخن عندك ,,,, تقلك كيفاش؟ يا سيدي ,,,, ولا تجاوبني انت ,؟
قالي :
-حاجة أعجوبة وفيها برشة كيف وفيانة....

عادا جاوبتو بلياقة ولباقة وقتلو :

-تشرق الشميسة عندي ,,,, نسخن وندفى وبروحي نحميك ,,,,, ,,,,, نبثعهالك تغرب عندك عقاب عشية تزهيك ,,,,, تشهيك تسخنك وادفيك ,,,,,

فهم هدرتي وسري وخناري ,,, فهم الي أنا نحكي على أوقات نومنا وقومتنا ,,,, أنا نرقد بعدو ونقوم قبلو

اممممممممم انتي شميستي وقميرتي اللي منورة ايامي ولياليا

ما نزيدش نطول عليكم هكة هدرتنا ومحلاها سنفونية ,,,, هدرتنا حلمة بين المغار والصبحية
نكتبوها لينا و للشبيبة الي نسات الرومنطيقية ,,,,,,
عشقة روحية بعيدة على الجسدية ...
______بنة الحومة & والراجل ______

بقية محلاك يا راجل محلاك 

J’aime ·  · Partager

محلاك يا راجل ... محلاك

محلاك يا راجل محلاك 

محلى وهرتك و حكمتك و ڨ داك 

محلاها دخلتك عليا .... ما تنجم كان تأثر فيا 

موش بالدوني ,,, أما بالفيانة وسياسة بش تخليني ديما معاك ....

محلى هدرتك ... محلى فصاحتك ,,,,, و ريشتك ...

الرجال الكل فداك .... 

إنت تحكي ,,,, و أنا نستخايل في دنياك ....

حليت الباب ,,,, وأنا مشيت بهواك .....

شكون المرا الي تراك وما تعشق هواك  ؟ ....

من كلمة للكلمة ,,,, حسيت بداك .....

وقلت في قلبي .... يا مرا هذا راجل و جاك ...

لا طامع لا في زينك ولا و لا طامع ,,,, يطلفح في هواك ...

محلاك ... محلاك يا راجل ....

حنانة قلبك ... باينة من عينيك ...

نغزرلك ,,, ونقول : نحسبو وخي و باي بعثهولي ملاك 

وعلاش لا ... لازم بين راجل ومرا ,,, تكون عشقة ووجيعة ؟؟؟

كونلو ميمة كونلو وخية ,,,,, ما تنجم كان تربح من تلاه ... 

معلومة ... هذرات بعدت عليها .. وهو بعثهولك الملاك 

نعوش فيا الروح ... الي في بالي ... مثلجتها بعيد على عينين الهلاك 

راجل هكة قليل .. وجدانك ,, وكايانك ...

في مخو و عقلو ألف بلية وبلية ... جا يحكي على حنية ....

ضاعت وسط  العيلة ,,, بين الوخي والوخية ...

مصيبة وبلية الشعوب العربانية .... 

خذاو من ولاد الأفرنجية ,,,, كان القشور ... وطيشو لب الحنية 

ضاعو وضيعوني معاهم ..... 

قتلو لا وراسك ,,, الشعوب تلهاو بالمادية ونساو الحنية 

بالطبيعة نحكي على شعوب العروبية ....

قالي ,,,, لا ..لا يا مدام لا .....

شعوب ولاد الرومية ,,,, خرجو من حروبات وليعات ,,, قامو ونهضو بالإبدعات 

في وسط المادية العالمية ,,, ونجحو وفكولنا الحنية على الإنسانية ...

ورماو للعربانية القشور ,,, وعراوهم من الفلسفة والفكرية ....

وخلاوهم تيليري .... بلا حنية ,,,,

سكتني بكلامو ومنطق وحكمة ,,, ما جاب من أمثلة و فكرية 

نورلي معاه السهرية ... وبقية نسأل في روحي ...

هاني مزال عندي حنية وفلسفة وفكرية ... مالا لازم نقصتني 

حاجة بش نترفع للمرتبة الإنسانية و يولي عندي باع وذراع في الإبداعية 

أنا في زمان تعدى و وفى في بالي فاهمة الرجال 

ذقت من الليعة والوجيعة .... إللي هذايجي .. يحكي معايا ....

وناسي الي أنا عندي فكر وفلسفية ... يحكيولي من اللول على الزين والڨ د...

أما هذا  حكى معايا من ورا الحجاب ,,, بيني وبينو سنجق وعلى ... 

لا سهلني ولا سهلتو منين جاء .... 

أنا طليت من وراء الحجاب ... شيطاني وزني ولزني ... قالي شوف وجه الي جاء ...

طليت من هاك النقبة وغمضت عيني وحفرت في مخي وجهك وقفاك .... هههه 

ريتك تحكي وعاطيتني بالظهر ..... كاينك جاي تزور مقام ولية في زاوية متربية ....

وعينك  ما راتش الي تعدى عليا ... وذنك ما سمعت شتقال عليا ....

أما أنا وعدتك يا راجل ,,,, بيني وبينك الي خلقني و صورك ... لا نغدر ولا نبيع ...

كنت معاك حمل وديع ... ومع غيرك ثور هايج ما يعرف لارحمة ولا سبيل ...

عطيتني الآمان ,,,, وعطيتك الآمان ....

حكينا لين عيينا وللراحة النوم إسجينا ....

وكي قمت الصبحية صورتك طول جات بين عينيا ....

قلت لازم لازم نكرم هاللقية ,,, كنز في وسط روح بعثهالي ملاك ...

جاني عقاب اليل ,,,, وونس وحدتك وفناك ,,, وخلاك ترجع يا مرا للفكر والمنطق والفلسفية ...

وتنسى العقلية تع ناس لاموك وغدروك و بالصوت جلدوك ,,,,,,

محلاك ياراجل محلاك ....

ذاكرة الأصوات من الروح

أحلام إمراءة تعدت سن الثلاثين 

وقد ذاقت منها الأمررين

أوذنييها تصدئت من همسات ... صراخ ... ضحك...ضجيج الماضي ... القريب و البعيد
تلك الاصوات التي سمعتها طيلة حياتها ... من الطفولة الى المراهقة ... ثم الكهولة
و ما أمرر الكهولة و أصواتها ...
ذكريات الأصوات .. لا تنسى أبداااا
هناك صرخات تريد محوها من ذاكرتها .. بكل ما أوتيت من قوة ...
أصوات الصراخ .... صراخ الآخر ...أصوات الإهانة ...أصوات الكذب ...أصوات الميوعة ...أصوات العهر ....
أصوات أصوات ..... ثم أصوات ...
لا تستطيع نسيانها تبا ... ...
فتدرك للحظة زمن أنها ...تسمع أصوات بالكاااد تتذكر أصحابها ....
صراخ ... بكاء ... همسات .. الطفولة ...

رنين موسيقة عذبة ,,, كانت تسمعها ... من تلك المراءة التي ...وهبتها ,,,, الحياة
و أنجبتها ...ذلك الصوت الحنين الملائكي ....
الذي تربت على سماعه
صوت محبة امها الرائعة  ... التى لا طالما حلمت .. أن تصبح  مثلها ... عندما تكبر ....
..........................................
حنين ... حنين .... ثم حنين لصوت الرجولة .....
الذي كان اول حب في حياتها ...أبيها ... ذلك الصوت الخشن ...القوي المتحدي الثائر ... بنبرة الخمر
المتفائل ,,,, الذي يصنع بصوته الهادئ معجزات ... بالنسبة لها ....
عندما كانت تبكي .... بدلال ...ذلك الصوت يشعرها بالأمان .....و الراحة ...فتهدء ... من روعها وتكتم أنفاسها ....
فقط لتسمع ذالك الوالد الحنين ....يغني من أعماق روحه ,,,
يغني لها ,,, فقط لها و ليس لغيرها ....
إلى أن تخر قواها .. عاجزة عن التحرك ... وتنام نوما عميييييييييقا
نوم طفلة صغيرة ,,, صغيرة صغيييييييييرة ......
...................................
ثم تصحو لتكتشق العالم .....
و الدنيا والأصوات .... أصوات أخرى مختلفة ... مزعجة .... مزمجرة ....
إنها أصوات قرع الطبول  ... طبول الكبر ... في  حياة أخرى
بدونه ,,, هو ,,, بدون صوته ,,,,,
واااااا أبتاااااااه
..................................
للأصوات ذكرة ... للأصوات ذاكرة .... أتذكر أصواتي و أصواتهم ....
للأصوات ذاكرة قوية ,,, عندي لن تتلاشى
.................................
هناك أصوات ترعبها ..... تخيفها ,,, تهابها ....
لا تروق لها  ,,,,,
أصوات أثرت فيها .....
أصوات إحتقرتها .....
تلك الأصوات ... نعم تلك الأصوات .... هاهنا في ذاكرة ,,, لا زلت أسمعها ....
.................................
ثم أصوات الفرح ... زغاريد ...,,,, أصوات و أصوااات
أصوات النجاح ...ياااه تلك الأصوات الموعودة كل سنة ....
موسيقى ,,,, فن ... رقص ... زغريد ....
فن ... فن ... فن ....
صوت صور المتحركة المفضلة لديها
.... صوت ساسوكي ... صوت ,,, سالي ... صوت بائعة الكبريت ,,,, صوت سنفور غضبان ,,, بابا سنفور
يااااااه .....ههههههه صوت جنبو الجبار ,,, صوت أوسكار ....
هل رحلت ؟؟؟؟؟ تلك الاصوات عند الكبر ؟؟
هل طغت عليها أصوات أخرى ,,,؟؟؟ أصوات حفل زفافها مثلا ؟؟؟
صخب أصوات الفرقة الموسيقية ....,,,
يوم حنتها ,,, حنتي ,,,, وأنا لا زلت مراهقة تنمو و تحلم ,,,
آآآآهاااااااات وأأأهات  ثم آآآآآهات لصوت حلم ... كان بالأمس  جميل ...
...............................
أصوات حلمت بها ,,, حلمت بسماعها بعد الزواج ......
في يوم ما تلك الاصوات ....كتمت أنفاسها ....
وماتت في بطنها .....
أصوات أطفالها الثلاثة ......ماتو قبل أن تسمع أصواتهم
حلمت ببكائهم ...
و عويلهم ....بقهقهة ضحكاتهم ,,,, حلمت بأصوات ضجيج لعبهم ,,,, نعم حلمت ....
تلك الأصوات التي حلمت أن ....تعوضها ....عن الألام والضياع والعجز  أمام طغيان بعلها ....
آآآآآآآآآآآآآآآآآآآآآآآآآآآه تلك الأصوات  سكتت .. قبل أن ترى النووووووور .....
كتمت أنفس أصوات أحلا ممها في بطنها ,,,
آآآآآآه لماذا كان هذا مصيرها دون سواها ؟؟؟ لمااااااااااااااذا
كانت .. حائرة ضائعة ... متمزقة ....
لقد سمع .. أصوات دقات قلب كل جنين منهم ....
...   في تلك العيادة الطبية .... الباردة
سمعت دقات قلب فلذات كبدها ....
تييك طاك تييك طاك تيييك طاك
صوت الروح ,,, صوت أرواحي ,,,, نعم أرواحي  ,,, أبنائي
,
,
,
وفي لحظة ما  .... لحظة ألم كبرى ........ و في كل مرة ...
تسكت نبضات قلوبهم ,,,
سكتت إلى الأبد ....
سكت صوت النبض في أرحاااامها ,,,
أو بالأحرى ,,,,, في أرحامي أنا ....
,
,
ما عدت أقدر لكتابة المزيد ,,,
سكتت أصوات ذاكرتي في هذه اللحظة .....
أم ولدت من أم ولم تلد ,,,,أصواتي سكتت .....

°°° بنة الحومة °°°

عسلامة
يا صباح النووور يا صباح الفل
اليوم نهار الإثنين  ... وكيفكنت صغيرة نكرهو ولا نحمل والديه
عندي أسبابي
الحاصل إخترلتكم نهار من مذكراتي
عمرت المنقالة على الخمسة ونص ... و قمت الفجاري بش نحفض سورة القارعة
أنا ماهو كي نحب نحفض نقوم بكري بش انجم إنشد في راسي مليح
عندي ساعتين تربية إسلامية .... عالصباح و أكيد ولد الحرام بش يخرجني للصابورة
أيا هزني الوقت و أنا نحفظ ,,, نسكر كتاب القرآن ونغمض عينيا ونعاود نسرست ... القارعة
أووووه ما أصعبها غلط ,,, عاود حل
القارعة ما القارعة وما أدراك مالقارعة .. يوم يكون أأأأأوه تكون الجبال كالعهن المنفوش .. فأما من ثقلت موازينه .. فهو في عيشة راضية .. و أما من خفت موازينه ... فأمه هاوية ...و ماأدراك: مااااهية ... نار حامية ...
صدق الله العظيم
وأنا نحفض فيها نخمم في بابا يرحمو ....
زعمة بش يدخل للنار والا للجنة ؟؟
صحيح بابا صاحب محنة ودبوزة .... وكل يوم كان يشرب و يشيخ وجو معاه
عندو UN bar DE COIN في الدار
ديما يحط دبوزتو و الديسك تع أم كلثوم و يسرح معاه
ساعات يذوقني منو مااابنو ومحلاه
أما  با با حنين و كريم مع الجيران والخدامة متاعو ... ما نتصورش خاتر يشرب كهو ربي بش يدخلو للنار
أوووووووووه كان يدخلو ندخل معاه ما يهمنيش ,,,,
نحب وين هو وين أنا ,,,, ما يزيش في الدنيا خلاني وحدي و في الآخرة زادة
إييييه نحبو نحبو نحبووووووووووو
أيا هاني نسيت الآية لخرة عاود أحفض ......
القااااااااااااارعة
الصورة هذي أنا وياها موش أصحاب برشة .... حفظت ما أطول منها
وهذي درا كيفاش ....
هيا النهار طلع و أنا قمت إنحل في عكستي .... العكسة أمي تعمل هالي في اليل
شعري طويل ويوصل للتحت ترمتي ,,,,, عادا تحطني قدامها وتمشطهولي ,,,,, وتبدى تغنيلي
سعدي سعد سعدي سعد وبنتي ما كيفها حد ,,,,
تي إي تعربن على غدوة بش كي نروح من الكولاج نلم الدار وفروشات لولاد ونغسل ماعون فطور الصباح ونطيب الفطور هههه
حفظتو الديسكو ,,,,,
عادا تبدى تغني وتشدلي شعري بعبوص حصان وتبدى ادور في كولون متاعها قديم مسنسر على طول شعري و تزيدو لقشة أخرى تع كولون آخر ,,,,,
بش الصباح كي نقوم يبدى أرطب وساهل مشيطو ,,,,
بففففففف حتى كان جيت بش نسيبو ماهو بش ترصيلي نظفرو
سيك خويا الكبير ,,,, قالي ما تحل شعرك وتقصو كان في العيد الصغير و الا كيف تلخو الباك
والا عند راجلك .......
أنا طويلة ومليانة ومن الي عمري أربعطاش ,,,, نسمع الي معربنين عليا
تقولشي عليا بقرة في كوري ,,,,, مالا بهامة
يعرفوني نحب واحد بركة ... وهو الي بش نعرس بيه ....
وكان ما نعرسش بيه يا نهرب من الدار يا إما نقتل روحي ....
هو بركا بش نعطيه بوسة كيما الي ريتها في مجلتي
Nous Deux
هيا في الحقيقة مجلة خالتي وديما تعطيني نتفرج في التصاور ونقرا قصص الحب الي فيها
أما تغيضني حاجة بركا ,,,,
كي نتبع مسلسل فيها و مبعد خالتي ما تشريش الحلقة الي بعد ,,,,,
هوكا نقرا القصة الي في الوسط مكتوب عليها
Romans complets
إي ما نحبش برشة الدووة نبقى نتبع نتبع وبعد ما نلقى شي ,,,,,
الحاصل نهار الإثنين آآآش نكرهو ,,,,,,
كملت ظفرت شعري ,,,عملت الطوالاتي
ودخلت للبيتي عندي penderie كبير متاع بابا من أيامات
عوزوبيتو ههههههه
هو قالي قبل ما يموت هذاكا متاعك فيه كل شي كتبتي الي ماهمش في المكتبة ,,,,
وحوايجي و فولراتي الكشمير
أي بابا كي يلبس سواريه ما يحطش كرافات كيما بابا عزيزي يلهوث الكشمير على رقبتو بطريقة حلوة
أنا نعشق حاجة إسمها بابا ,,,
أمي تقلي من وقت الي بديت إدادش ..... تمشي طول تجيبلو cuvette
تحب تغسلو ساقيه ...وهو بيدو ما يخلي حد يغسلو ساقيه ويمسدهملو كان أنا ....
الحصيلو حليت باب ال بوندري ... وبديت نفرز نلبس سروالي الدجين...
معاه ,,, مريولي الأكحل ,,, و السبادري ... و الا نلبس الكولون فوقو شورتي المبر و صوريتي البيضة والديباردور الجاكار ؟؟؟
في الإخر لبست سروالي السيرفاتمون ومريول خويا ,,,, و السبادري ....
صاكي محضرتها من البارح تع القراية هبط للوطة للكوجينة شربت قهوتي و كليت لقشة كاك أمي طيبتها البارح ....
و عننننننن إلى الجهاد ,,,,
منديلتي نسكر فيها في فم باب الدار ,,,,, كان يراني خويا قفلة بركا محلولة نهاري يشوام .....
فك عليا منو ,,,, هني سكرت جد والديها ,,, محسوب
في راس النهج عرضتني أمي ,,,, ما عادش بكري عليك ....
إي غي هاني تو نعمل جرية ,,, نخلط على تحية العلم ,,,,, بف شكونة نكره تحية العلم ,,,,
وهاكا أنيس القواد يبدى يدز في صدرو ويطلع الحبل تقولشي بش يصنع صاروخ .... بو يخدم في الشعبة ,,,,
ما عليناش فيه ههههههههه
برا نهاركم فل و ياسمين ,,,,,,,

°°°بنة °°°
°°° الحومة °°°
نهديلكم هاغناية الطفولية متاعي هههههههههههه

http://www.youtube.com/watch?v=UZqyssnv5Gw

نهار أحد من مراهقة حومة

عسلامة 
اليوم نهار أحد .. كيما تعرفو ...
عندي كراسة نومرو 48 كنت نخربش فيها مذكراتي ... الصبيانية 
عادا خترتلكم منها ... نهار أحد من وقت مراهقتي ,,,, بتصرف بالطبيعة 
بش إنقص حاجات (أسامي خواتي وعايلتي ) مثلا 
ونوضح حاجات(في هذاكا الزمان ما كنتش موجودة ) ...
نهار الأحد ويا ماندراك سنة 1991 و قتها أنا عمري محسوب 16 سنة
صبية نتسمى ....
قمت مرعوبة على صوت شناب الحلايبي .... حليييييييييييب حلييييييييييب لبن ,,,, حلييييييب
على طول صوتو في النهج ....
يعطيه بلحوح وااش يصييح الخردوق ... أنا ما نحملوش ... على خاتر كي نمدلو الفلوس
يبقى شاددلي يديا ويبلحق في صدري ,,, نحسو يعريني الهم فيه ...
نمشي للبيت لولاد نقيم خويا الصغير ... الي هو مثابت ولدي يعيطلي °°ياااا°°°
بابا كي توفى .. أمي كملت قرايتها وخرجت تخدم علينا بما أنو عندها Le brevet dans le temps
خوللها بش تقرا فرمليا ,,,
ماعليناش هي راجل الشارع و أنا المرا في الدار في وسط تلاثة عزالكة ..
,,,, قوم عيش ولدي ,,, قوم إشري الحليب قبل ما شناب يخطف الدورة
أيا يا روحي ونترمى عليه ,,, نشدو من يديه ,,,,, ونعملو ,, تكسييلت السييييييييييييد يكبر ولدي ويزييييييد ...
يقووووووووم عادا ويبدا يصيح نحححححححححب نرررررررررررررقد أوووووووووف
أيا حبيبي برا خو هاي الفلوس ... ويزي من تخرنينك يا بطي ,,, ومبعد تمد انت لول وجهك فوق الطاولة
هههههه بطبوطي يدحدح ويجيب الحلايبة ...
و أنا نغسل ماعون الي لولاد استعملوه في اليل بعد ما رقدت
ساهرين يتفرجو عالأفلام في الفيديو ,,, و أنا ممنوع عليا نتفرج معاهم خاتر معاهم أصحابهم ,,, في بيت الصالة
أمي بايتة تخدم جات ,,, طول رقدت ,,, ظلمت عليها البيت ...
وغطيتها ,,,
وووووووووه يستنى فيا صابون قد الماهي وه
حطيت تنجرت الماء تسخن ولقشت الصابون في كاصارونة تتنفخ ,,,
وحظرت النصبة القصعة واللوحة وكرسيا الصغير اللوح ...
وبديت بالبيض ,,,, والبانو تع كلاسك لولاد صبيت عليه شويا ماء سخون وه الروايح
وأنا على ركايبي بالبروس نحك في البقايع تع الدجين تع خويا الكبير يجي العزلوك الوسطاني
وووووووووطرطاف موشطة على ترمتي نجي مادة الأربعة و شطر بعبوص ضفرت شعري تجي
بانو الصغير بتاع الكلاسط .... نقوم كي المهبولة ... عينيا بش يخرجو من بلاصتهم وشرارة الشر تنوقزلي في مخي
يهرب ويطلع للطابق الفوقاني ويصيييح والله العظيم وراااس بيت مكة نفدلك معاك يا حومة
ورحمت با با نفدلك ,,, و أنا في شورط وشلاكة بوصبع بلاسطيك
نجريفي الدروج خصني بشنطير ...
سكر على روحوباب بيت البانو ,,, باهي صحة ليك أمي راقدة يا سفج ,,,
ورد بالك اليوم وجهي يقابل وجك هاني وسيطك يا بوال ....
,,,,,,, بقى محسور الغادي لين سمعني هبط نشلك ....
أيا هبط نكمل صبوني ...
كملت غسلت الحوايج البيض
وبعد الألوان والدجينات تع السكرفة خواتي وأنا عندي كان جرد زوز دجينات لوفيس مسطحفظة عليهم عندي تلاثة سنين واحد منهم تهرات ترمتو ولاخر تهرات مع ترمتو أأفخخاذو 
و سيرفاتمون متاع السبور 
وبوسطواتي ههههه
هذا الكلو كملت شللت صابوني وعصرتو من بانو للبانو الأمو الحمدالله ما وفاش كيف لحد الي فات ,,,
هيا طلعت فوق السطح وبديت ننشر وننشر وننشر وننشر ... يا حبيبي والكنستروات الزوز مزالو معبين .....
ماعاد عندي وين ننشر ....
برا نمشي للدار جرتنا ,,, نلقاشي عندها شريطة فاضية ....
هزيت الكنسترو اللخر وعاودت هبط بيه وخرجت ,,,
صااااباااح النوور خلتي منجية 
نلقاشي عندك شريطة فاضية ؟؟؟
نقص من صوتك عيش بنتي ....لولاد مزالو راقدين تو يقومو يشومولي النهار ....
تي باهي صباح الخير ,,, فما ولا لا ؟؟؟
إي زوز ... زوز وماتعملش الحس برا ماك تعرف الثنية
إيه مليح
كملت وروحت 
لقيت سي السكافندري الكبير قام و يلوج عليا ....
وين كنت ربك ساعة وـ أنا نعيكلك 
؟؟
في دار خالتي منجية نشرت عندها بقيت الصابون سيدي 
ويشدني من ضفيرتي ويخنقني بيها هههه عادي عادي 
جوست وجيعة صغيىرة وتزغليلة في العاين 
موووش قتلك ماعادش تعفس دار خالتك زبالة عندها العزرررررررة ربك ألف مرة نبه عليك ....
باهي توااااااا سيبني برحمة بابا خلي نلم الحوسة قريب نص النهار بش نركب الفطور ,,,
وإإجباد يشفرني ويقلي هاني نلملك فيها ,,, إنت راسك صحيح يا نهارت الي بش نفضخهولك ....
وأنا في قلبي نقول ووووووووه يابابا كان جيت حي ما تخليهش يمد مكاسرو عليا ....
كنت دلولة بابا ,,,, يرحمك يرحمك يرحمك قداش نحبك يا  عزيز قلبي 
أيا كملت فرغت اباانوات من الجر ,,, وبانو التشليل خليتو بش نيق بيه الكوجينة والدار و زيد رزين عليا ....
هيا بعثت خويا الصغير للمرشي يجيب نص دجاجة و ميتين غرام حمص و كعبة ليتو الأمي تحب سلاطة اليتو ...

وقتلو رد بالك على الخمسةلاف بش نرجع الباقي للأمي 

سكر عليها بيديك مليح ورد بالك تلعب حفرة راني نستناك بش نطيب الكسكسي

برا وبقا يخرنن عليا ,,, ياااااااخي فما كان أنا في الدااار يخي عبيد عندك وبرا من هاك الاوي 

برااالف روحك النهار راح ووووووووه عليا 

هيا أنا قريب نكمل المسحان و سيدي خويا الكبير يدخل سبادريه كلو وسوخات يعفسلي من الكلوار للبيتو ....

ما يلزمنيش نتكلم وما يلزمنيش نقلو حرام عليك لاااااااااااااااااا وووووه كان نحل جلغتي ناكل المصبط  

فك عليا منو توا الي صار صار 

برانعاود خيشتين وحدة مبلولة نحي بيها الطباعي ولخرة شايحة ,,,,

وندخل للكوجينتي 

,,,, وأنا هكاكة نسمع في عركة في الدار الفوق 

سيك البوهالي الوسطاني ثرانيتو البارح سبت ,,, عندو بوم في لافيات مشى لبس صوريت خوه وورجعها معلقة ,,, وفيها ريحة بارفانتو 

براا آش بش يفضها توا ؟؟؟

تقوم أمي من النوم ...

مسكينة عينيها منفوخين ,,, وبدنها تاعب ...

علاه هكة شعملتلتلكم |؟؟؟؟

سي الوسطاني أنا متشمتة فيه خلي ياكلو قلبو هههههههههههه

وفي نفس الوقت هو دلول أمي وديما تحامي عليه وشطر الضرب يجي فيها ,,,وهو ديما في عمايلو 

برا أنا هاني في كوجينتي ... لا ندخل لا وذني حتى نسلم من ضربهم

برا مقصوفي البوطي دخل عروقاتو شرتلة ويلهث ...

ههههه شديت بمريولي الطويل مسحتلو وجهو وعطيتو بوسة مرسوسة ,,, باين تعدى يلعب ,,, وتفكر القضية .. مشى يجري وروح يجري

هيا ما نطولش عليكم طاب الكسكسي و ,, وقليت قرينات فلفل و زينت السلاطة وحطيت الطاولة ,,,

تلمينا نفطرو ,,, النفس طالع هابط ونهز عينيا 

نلقى الوسطاني ,,, عينو مكنفرة وحمرة دم ,,, هههههههههههههههههه

غزرتلو وجات العين في العين 

نعطيه تبسية وطلعت وهبط حواجبي متاااع إإإإياه محلاها فيك ,,,

هههههههههه

أيا أمي قالتلي خلي توا أنا نغسل الماعن برا إنت للحمام غدو عندك قراية ,,,

بش تروح تكمل دروسك ,,,,

باهي يااا ,,, ماكش ماشيا معايا .؟؟ 

لا عندي تلاثة بش نزرقلهم ,, بالوقت .. عاملين عملية .. إمممم فراكسيبارين ...نعرف

مسكين تحرم روحها من الحمام بش إدخل بأزيد فرنك و إدوش في الدار وتسخن الماء في الطنجرة 

 وقتها ما عندناش شوفو إيي نعم

الحاصل نهار الأحد نهار طوييييييييل وما يوفاش ,,,,

نكمللكم جزء متاع العشوية نهار أحد آخر

 °°°° حومة °°°°° 

شجرة صغيرة وسط الريح للفنان لطفي بو شناق

شجرة صغيرة وسط الريح .... القلب ... القلب
شجرة تهب الريح عليها ...
شجرة صغيرة وسط الرييح ... الحب ... الحب
وحدو الي يقدر يسقيييهاااا

العصافر تكبر واطير تخلي وراها بعض الريييش
والشجرة في الشارع الكبير ...عطشاانة وتحب تعيش
قلبي كي الشجرة عطشااان ... يشكي ولا من يعلم بيه
ويتمنى تبكي الأغصان  ... لا علا الدمعة تسقيه
لكن ديمة الشجرة خضراء ... وكي حبيت فهمت علاش
ومهما عاش الي ما حبش ... كاينو عمرو ماااعاش

شجرة صغيرة وسط الريح .... القلب ... القلب
شجرة تهب الريح عليها ...
شجرة صغيرة وسط الري ... الحب ... الحب
وحدو الي يقدر يسقيييهاااا

شجرة تغزر للعشاااااق ....في الشااارع ثنييين  ثنيين
تتنهد من الاوراااااق .... تسهل عصااافرها فييين
قلبي كي الشجرة مجرووووح .... يتمنى عشقو يداويه

ومن كل لو تعشق الرووح والميت عشقو يحييه
لكن ديما الشجرة خضراء... وكي حبيت ... فهمت علاش

شجرة صغيرة وسط الريح .... القلب ... القلب
شجرة تهب الريح عليها ...
شجرة صغيرة وسط الري ... الحب ... الحب
وحدو الي يقدر يسقيييهاااا
http://www.youtube.com/watch?v=Pinnh9Q9QsI

هذا صباحي

عسلامة
محلاها عبارة صباح الخير
نسمعها كل يوم ومانقفش عندها
شأنها شأن الكثير من الأشياءالجميلة
في حياتنا الي تعودنا أنها تكون
موجودة في حياتنا ديما
يعني إنجمونقولو صباح الفرح
صباح السعادة ..صباح التفاؤل والنشاط
صباح التفاؤل والأمل
أنثر خلفك زهور
واصبر شويا ترى نور

عمرك لا سمعت إنك إنت من يصنع في الحياة
وأنك الوحيد الذي تملك القوة على التغيير
ما تعرفش أنك لو رقدت ,,, ما عادش فما طعم للحياة
وأنك وحدك المُلام لو لقينا أي تقصير
لا ربما كنت ترى الحياة بلاش ألوان وبلاش جمال
ولا ربما كنت تظن أنها هكاكة
وإنولا دخل ليك وأنو هذا هو الحال
آمان  فكر ولو للحظة بعقل واع ٍ
هل هي حقاً هكاا ..؟

كان ما لقيتش  الجواب إنقولها لك:
لا .. نعم : لا..
وماا تستغربش من الجواب
أنت الي  تلوّنها بريشتك
وكأنها لوحة ليك
أنت الي تظهر جمالها وتفتح ليه الأبواب
خليهاا ملكك و ماكش بش ترضى
أن تملك القبح و السواد
وإملك الروعة هو المراد إمشي بيها
وتغلّب بخيرك على ظلامها

إمشي وفسخ الشر من الأجناب متاعها
راهو بيدك انت برك الإرادة والتحكم
حط بين عينيك الي  إنت تنجم تعمل  الي تحب عليه
أعمل الحاجة الي تفتخ بيها  وخلي وراك
ورد وفل فاوح ,,, ريحتها تنعوش
كتباتك وحياتك
أصنع الخير ,,,,,, بالخير تتنور الدروب
والدنيا هذي ديما محتاجة للخير متاعك

كي تبقى شمسها مشرقة من غير غروب
وكي يعمّ الخير عليك وعلى غيرك
تذكر أنك من يصنع في الحياة
فافخر بالخير الي خليتو وراك
وافخر وقت  ما تراه الأثر  متاعو علي جابك
ورباك وعلمك .....
هكة راهو تنور الدنيا
أرمي وراك الفل والورد الفاوح
وأصبر شويا ترا ها منورة  ببوجودك
الصباح كلمة تفرح تحل قناتر الأمل
و الحب كلمة شوق وتشويق
تبدا بصباحكم عسل مثلا
هيا ,,,,, هيا هيا  أنا هاني كيفاش نراه الصباح
نحب نعمل فيه قوس قزح نلونو بضحكتي من عينيا .....
ههههههههههههههههههههههههه
------------------------------------حومة

تعرف هاك الإحساس بالضياع متاع إنسان الذاكرة متاعو قعدة تلعب معاه في un salle tour ....
هاك الإحساس تع التبهيم الغير إرادي .... تبدى ضايع ضايع وإنت تبدى في الوسط بين المخ والمخيخ والضمير و الذاكرة بنت الحرام تشطح وتردح ....
تاخو ما تعطيك شي ...
تهزك على ورقة على زربية حرير ... راقدة نحس في روحي وموش راقدة ...
فايقة وموش نتحرك ...نتكلم وما يخرج شي من فميى .. الصوت ما ثماش ما عنديش 
إدور وإدور وإديك محلولة وما إدوخش ....
ننسى كوني ‘إنسانة ونحس الي أنا شيئ من الطبيعة ... شيئء بصفة 'ثنك '
نعرف وما نعرفش .... تتبهلل وإنت أصلا بهلول ,,, نغزر وما نرا شي ...
أحلى الأحسيس .... كيف ناخو جرعة المسكن ضد الوجايع .... نولي بعدها ما عندي حتى وزن وجودي ..
وما عاد نحس بشي كايني ورقة هازها الريح لا موش الريح هاززها هوى ,,, نسمة ,,,
إي نسمة حنينة في وسط جنينة ......

_____________بنة الحومة ___________

Inuyasha's Lullaby (Full)

I don't own the song. This is the full song. If you just like the beginning of the song I have song with just the beginning. Please Comment and Subscribe!!!

YOUTUBE.COM|PAR SOLARBF

عسلامة

نهار جديد في حياتي
ودرس جديد في حياتنا ...

موش ما نحسش بالوجيعة ... كيما إنت تخمم
تعلمت ... نتحكم فيها
موش ما عنديش عاطفة و إحساس ... كيما إنت تخمم
تعلمت نطردها فيسع في الوقت المناسب
حياتي ما كانتش ساهلة ... كيما إنت تخمم
تعلمت نطوي الصفحة ...
____ موش قاعدة نعيش فوق السحاب ... كيما إنت تخمم
____تعلمت نحب حياتي
°°° موش نتصور روحي أشب من البقية الخلق
°°° تعلمت نحب روحي كيما أنا
مانيش ياسر معروفة .... كيما إنت تخمم
تعلمت نسمع الناس لخرين

مانيش ياسر ضعيفة الشخصية ,,, كيما إنت تخمم
تعلمت إلي الكره والحقد ما ينجم يعاون حد
__ أنا ما نعرفش كل شي على هالدنيا ... كيما إنت تخمم
__ تعلمت نعبر على أفكاري بصوت عالي
ولكن إنت يا الي تقرى في هالسطرين ...
عندك قيمة ( valeur) كبيرة ... أكثر من الي كنت تتصورو
إلا إنك مزلت ما تعرفهاش و ما طورتهاش ...

_______________ بنة الحومة ____________