صرخة نملة
يحكمو فيها الخنفوس والنحل و الورل والوزغ
تصرخ النملة
ما يسمعها حد
لا الي في سابع السموات ولا الي تحت السابع أرض
النمالة يلزمها تعيش
وبش تعيش
ما يلزمهاش تصرخ وتصيح
ولا تمشي جنب الحيط وتقول أخطى راسي و أعفس
النمالة بش تعيش ما طالبش في حقها في العيش والرغيف
يلزمها تحفر نقبة في الأرض وتتخبى فيها
النمالة بش تعيش
وما تمشيش في العفس
يلزم ترى وتشوف وما تتكلمش
الأرض هذي موش أرضها
الأرض يحكم فيها الوزغة والزرزومية
يقسموها على شوية خنافيس وذبان
والنحلة الليبيرالية
النملة كي تمرض تبربص وتموت
النملة إطشها بالماء تهرب
تعفسها تموت ويموتو معاها ميا
صحيح عدد النمال أكثر من عدد
باقي الحشرات الحاكمة
صحيح النمالة تخدم وتكد على قوتها
على شوايا فتفات
وما يلزمهاش تذوق من الحلويات
صحيح النمالة بريئة وناس ملاح وزوالية
لكن تبقى نمالة مهما عملت ومهما صاحت ما يسمعها حد
يقلولك شكونك انت ؟؟
مجرد نمالة
نمالة تحب تخرج من حفرتها
وكي تخرج تنجم تعيش في وسط الخير
الخير والنعمة موجودين
ويزازيو الناس الكل
أما شنوة تنجم تعمل قدام الحشرات القوية والضارة
صرختك ما تنفعش بش تعيش يا نمالة
راك نمالة مهما شنوة عملت و صنعت
القسمة مقسومة والخبزة كلاوها الصحاح
والطحين مخزن ليهم برك
يا نمالة صيييييح و هيج وبربص ههههه
ما يسمعك حد وما يراك حد
صوتك ماعندك بيه وين توصل
لم النمال الي كيفك وما تغوروش على بعضكم
وشوفو أرض تصلح بش تنجمو تعيشو
ديقة ديقة النمالة هيا الشباب على الدوام على
مر العصور في بلدان العربان
صيح يانمالة أصرخ وما يسمع بيك حد ......
هيا توة قوم أمسح دموعك ..... ما راك حد
°°° حومة °°°
Aucun commentaire:
Enregistrer un commentaire